whys ????

بسم الله الرحمن الرحيم

 

 

الليل

 

 

الليل نقدر ننام فيه ونرتاح عشان نصحى الصبح نروح أشغالنا ومدارسنا وجامعاتنا

however

مش هتفرق كتير

المهم ان فيه مكان روتيني مقرف بيتراح كل يوم

وفيه حاجات رخمة بنعملها كل يوم

 

وبنشوف ناس كل يوم

بنفس ابتساماتهم الصفراا اللي مالهاش اي معنى

بنشوف نفس البياع اللي في المحل كل يوم

بنشوف نفس الزملاء كل يوم

هما هما نفسهم والله

 

بنفس هدومهم ونفس ضحكتهم البايخة

ونفس اخلاقهم الخسيسة

ونفس مصلحجيتهم >>>>> مصلحجيتهم تعني نسب صفة المصلحجية لهؤلاء الأشخااص

الناس اللي أعلى مننا بشوية : المدير لو كنت بتشتغل ، الأستاذ أو الدكتور لو كنت بتدرس

 

الشوارع زي ما هيا

كل حاجة زي ما هيا بقرفها وغباءها

 

بس طبعا لو مفيش نوم كويس بالليل مش هنقدر نستحمل ده كله

الا بقى لو انتا بتنام االصبح زيي كده

ديه حالة تانية

يبقى العيب منك انتا

 

لكن فيه حد يقدر ينكر ان اساسا الليل هوا اللي المفروض ننام فيه ؟؟؟؟

طبعا ماحدش يقدر

 

هوا نفس الليل ده بتسهر فيه مع اصحابك ، جيرانك ، حبيبتك ،،، حبيبك ،،،،،،،،،،،، لوحدك مع القمر والنجوم

هوا نفس الليل ده بتعمل فيه حاجات كتييييييييييييير

 

عمرك خدت بالك قبل كده ان الليل لونه (( اسود )) ؟؟؟؟

اكييييييييييد

 

اوك حلو اوي

ديه كده اول حاجة

 

 

 

 

تاني حاجة

لما كنت لسة يا حبيبي نونو

كنت في بطن ماما

كانت كل حاجة حواليك لونها ايه ؟؟؟؟

اسود

 

 

 

ولما ان شاء الله ربنا يفرجها عليك كده وتموت

هتروح فين ؟؟؟

القبر طبعا مع مكنر ونكير يضربوا فيك كل واحد من ناحية ، ومع حبيبنا الأقرع الشجاع يهبدك من سابع سماء لسابع أرض عشان مش بتصلي يا حلو

القبر هيكون لونه ايه ؟

اسود ؟؟؟

 

 

وصلت الفكرة ولا لسة ؟؟؟

كل حاجة حلوة سودة

وكل حاجة وحشة سودة

 

غير انه بيليق في اللبس مع اي لون

 

روح هات بنطلون اسود ولا انتي هاتيلك جيبة سودة ، وابقوا قابلوني لو مالاقش مع اكتر من نص الهدوم اللي في الدولاب

 

وبيريح التخان اووووي

عشان بيبين اي حد رفيييييييع

دايما تلاقي التخين بيحب يلبس اللون الاسود

 

نعم ياخويا ؟؟؟؟

عيد كده تاني ؟؟؟

عمرك ما خدت بالك ؟؟؟

 

طب ابقى ركز بعد كده يا حبيبي وهتشوف ان كلامي صح

 

عالعموم انا حاسس ان اللون الاسود لون جميل اووووي بس للأسف فيه افكار سيئة اوي دخلت دماغنا عنه

وفيه اشاعات كتير اوي بتطلع عليه

 

بيقولوا عليه انه لون الحزن ،،،، مع اني شايفه لون : الرومانسية ، الهدوء ، التفكييير ، الاستقلال ، الحرية وحاجات حلوة كتييييييير

 

حاول انتا بس تغير فكرتك عنه وربنا يهديك

 

على العموم انا كتبت خاطرة عن اللون الاسود

ديه كانت من اوائل الحاجات اللي كتبتها

او تقريبا كانت اول حاجة

 

طبعا فضلت محتفظ بيها لنفسي فترة طويلة جدا

 

ومرة حاولت أقراها لحد من أهلي بس .......................... آآآآآيوووووووووووة هوا كده

زي ما انتوا عارفين

 

تريقة ومهاجمة وووو إلخ

 

يللا هحطها هنا واشوف التعليقات

ياااااارب يكون فيه

 

 

 

 

 

 

 

 

 

لون الحياة

 

أسَفِي عَلَيكَ يَا مَنْ ظُلِمْتَ كَثِيرًا فِي هَذِهِ الحَيَاة

ظُلِمْتَ كَثِيرًا وَقِيلَت عَنْكَ الأقاويل وَظَهَرَت عَلَيك الإشاعات

فانتشرت في الكون بسرعة لو اسْتَطَعْنَا اللِّحَاقَ بِهَا لاخْتَرَقْنَا حُدُودَ الزَّمَنِ

لِـيُـصَاحِب ذَلِك الانتشار مُبَاشَرَةً التَّصْدِيق

تَجِد الناس يُصَدِّقُون تِلكَ الإشاعات وَكأنهم يستنشوقنها مع الهواء

قِيلَت عَنكَ الأقاويل وقَبِلتَ بِها

ليس لِصِحََّتِهَا وإنَّمَا لِسِعَةِ صَدْرِكَ وَصَفَاءِ رُوحِكَ

كَمْ قَدَّمت لَهُم مِنْ خَدَمَاتٍ وَتَضْحِيَات

وَلَكِنْ لا تُقاَبَلُ إلَّا بِالْحَربِ َوالاعتداء

دون أدنى شكر أو حتى ثناء

لِمَ كل هذا ؟

هذا كله بسبب تلك الأقاويل الخاطئة

تلك الأكذوبة التي اختَلَقُوهَا لِيَعِيشُوا فيها

وكذلك لِكَونِ جَمَالِكَ لا  تُدِرِك عَظَمَتُه القلوب

 ولا تفقه روعته العقول

وما ذنبك إن كنت لون الحياة البديع

وما ذنبك إن كان رونقك لا يَرَقَى لِفَهْمِهِ إلَّا القَلِيل

لا ترقى إليه إلَّا  تِلكَ الرُّوح السَّامِية الطَّاهِرَة الَّتِي متَّعَهَا الخَالق بِبَصيرة نافذة

 وَهَـنَّـأها بِمُتعةِ تأمُّل إبداع ذوقِكَ الرَّاقِي

هل نَسوا أنَّك الوحيد القادر على التَّوهج بالسَّواد وإنارة الكون بالظلام

ذلك الظلام الذي لطالما عَشِقْتُهُ

ذلك الظلام الدامس الذي يتغلب على الضوء بقوة وشدة ضوء ظلامه

هل نسوا أنك سيد الألوان وأميرها

هل نسوا أنك ملك الرومانسية ... وَمَلاكِهَا

لا تحزن يا عزيزي إن لم يقدِّروك حَقَّ قَدْرِكَ

فَلَقَد أعْمَتْ مَطَالِبُهُم قُلُوبهم

وَغَطَّتْ غِشَاوَةٌ عَلَى أبْصَارِهِم

أصْبَحُوا لا يَعْلَمُونَ احْتِيَاجِهِم

لا يعلمون احتياجهم للنَّقَاءِ والصَّفَاء

أصبحوا يَتَخَبَّطُونَ في عالمهم الذي صنعوه بأيديهم تحت هذا الضوء المبهر

هذا الضوء الذي لَطَالَمَا أحَبُّوهُ وَعَشِقُوه حَتَّى سَلَبَهُم عُقُولهم

لَقَد بَاعُوكَ يَا عَزِيزِي فَلَا تَحْزنْ عَلَى فُقْدَانِهم

لقد باعوك وأهملوك لانشغالهم

انشغالهم تحت بهرجة أضوائهم وصخب مدنهم

اِنْشِغَالِهِم بِجَمْعِهِم نُقُودِهِم وَإحْصَائِهِم مُمْتَلَكَاتِهِم

لم يُمهِلُوا وقتاً لأرواحهم

عرفوا إلى حد الملل متعة أجسادهم وعقولهم

وأهْمَلُوا أروَاحِهِم وَقُلُوبِهِم

لم يعرفوا إلا أصناف الطعام وألوان الشراب

لم يعرفوا إلا إنهماكهم في جمع الذهب والمال لإنفاقه على مَتعِةٍ مَادِّيَّةٍ دَنِيئةٍ فَانِية

فلا تحزن يا عزيزي إن لم يقدِّروك قَدْرِكَ

فَقَدْرُكَ مَحْفُوظٌ رَغْمَاً عَنْ أنُوفِهِم

سَتَبْقَى أبَد الدَّهرِ مَنْجَى المَظْلُومِين وَمَلَاذ المُسْتَضْعَفِين

فأجوك سامحهم واعفو عن أخطائهم وجهلهم

أرجوك لا تَرْحَل عنَّا فمازال هنُاَكَ الكَثِيرُون

الكثيرون مِن ذَوِي العَوَاطِف الجياشة الَّذين تدفعهم رقة مشاعرهم إلى التَّفَكُّرِ وَالتَّأمُّلِ فِيك

لا ترحل فإنَّك وَحدَكَ مَنْ يَفِرُ إِلَيْهِ الَمظْلُوم حِين يَتَرَاكَم عَلَيهِ غُبَارُ الحَيَاة ومصائب الزمن

لا ترحل فَفَقَطْ فِيكَ يُخْفِي الضَّعِيفُ دَمَعَاتِه الوَحِيدَة

وكذلك يخفيها القوي الذي اعتادت دموعه على الاختباء والاختفاء كي لا يَرَاهَا النَّاس

لا ترحل فهناك الكثيرون أمثالي الذين لا يَجِدُونَ غيرك ليشاطرهم أحزانهم وليفضوا إليه بهمومهم

ستبقى أنت أبد الزمان الرمز الحقيقي الوحيد للسعادة

ستبقى أنت الوحيد الدال على صفاء الروح ونقاء القلوب

لا ترحل وانتظر ...

سترى من يشاطرك أحزانك

وسوف تجد من يُكَفِّفُ عنك دمعاتك وَيُوَاسِيكَ فِي وحدتك

ولا تنسى أن تكافئ بعض المستحقين

الذين لا يرجون منك مكافأة إلا أن تمِنَّ عليهم ببعض الوحدة والظلام ليتمعوا فِيهِ وَفِيهِ يعيشوا أجمل لحظات حياتهم

تحيتي إليك ممزوجة بالحب وكل الاحترام والتقدير كله

ممزوجة بكل معاني الجمال السامي التي تستحقها

وكذلك ممزوجة بالأسى والأسف على حالك

وَ واللهِ لست أعلم هل أحزن عليك أم على هؤلاء الجَهَّال الَّذينَ حَرَمُوا أنفسهم لذتك

تحية يتقدمها ويمثل عنوانها اعتذار موجه شخصياً إلى ذاتك الراقية ذات المشاعر والأحاسيس النبيلة التي تنقلها فقط لمن يستحقها

تنقلها فقط لمن تحدى العالم بأسره واختارك أنت له رفيق وحبيب

فأصبح لك عاشق ولهان لا يرى إلا  من خلال نورك الأسود المضئ

تحيتي إليك أيها اللون الأسود

تحيتي إليك يا : سَيِّدَ الألوان  .......... وأمِيرِهَا

 

 

 

 

 

 

معلش

كلام كتيييييييييييير بس والنبي أقراه

انا كاتبه كله من اوله لاخره

مفيش نقل ولا اقتباس ولا اي حاجة

كله من عندي

افكار كتابة كلللللله

حاول تقراه وتديني رأيك بلييييييز

 

يللا سلاموز 

 

 

 

 

 

باللوز

هههههههههه 

 

بسم الله الرحمن الرحيم

 

 

 

النهاردة أبدأ بوضع خواطري

 

الخاطرة ديه كتبتها لما سيبت مصر

سيبت كل أهلي وأصحابي وقرايبي هناك

 

 

أنا متأكد دلوقتي إن فيه حد بيقرا الكلام ده وبيقول :أهل مين دول وقرايب مين وأصحاب مين

 

الأهل والقرايب بيننا وبينهم خناقات ومشاكل ما يعلم بيها إلا ربنا

والصحاب كلهم بتوع مصالح

كل واحد ياخد مصلحته ويوم ما تخلص ولا يعرفك

 

أنا عارف ده كله طبعا ومقتنع بيه جدا

 

 

يا جمااااااااعة

أصحابي دول ممكن يكونوا حاجات كتير جداً

أصحابي دول ممكن يكونوا : البلكونة

أيوة البلكونة

وبلكونة بيتنا كمان مش بلكونة المزة بتاعتي

 

 

 لما أقف في البلكونة طول الليل وأسمع أحلى الأغاني وأطرب نفسي بصوتي الجميل - على فكرة انا صوتي حلو أو على الأقل انا حاسس انه حلو - وأتفرج على الناس اللي في الشارع بكل ظروفهم وأحوالهم وأوضاعهم الجميل منها والغريب العجيب المريب

 

بشوف حاجات كتييييييير  

 

ساعات بشوف 2 سواقين تاكسي بيتخانقوا مين يعدي قبل مين

وساعات بشوف الباعة المتجولين

طبعا مصر مليانة منهم

 

بس بالليل مفيش طبعا حد بيبيع خضار وفاكهة

ولا لبن

ولا أنابيبب غاز

بالليل (( جو المزاج والروقان )) بيبقى فيه ناس بتبيع لب وفول سوداني

وفيه ناس بتبيع بطاطا مشوية خصوصاً في الشتا

وترمس

وحاجات تانية كتير

 

 

ساعات بشوف جيراننا وناس تانيين رايحين يصلوا (( العشاء أو الفجر )) لإني أكيد لما بقف في البلكونة بيكون بين الوقتين دول

وأحياناً والله بيكون وقت المغرب كمان

 

ساعات بشوف عيال بتلعب كورة واستغماية وألعاب أول مرة أشوفها

ساعات بشوف راجل راجع من شغله بالليل يا عيني وشايل شنطة ومعاه اوراق وشكله تعبان وعرقان وحالته حالة

ساعات بشوف ستات بلدي بتوع (( حبيبتشي وياختشي )) قاعدين يتكلموا ويضحكوا ويغتابوا في خلق الله

وساعات بشوف مزز ماشيين بنص هدوم وحاطين كل واحدة 10 كيلو ميك أب على وشها وقال ايه بتقول محدش يعاكسني

ساعات بشوف ستات كبااااار فوق الخمسين سنة لابسين بنطلونات ضيييقة وصابغين شعرهم وماشيين

وللأسف العمر باين عليهم اوي وظهرهم متني ومأتب من العجز

بس برضو مش ساكتين ورايحين يعملوا حاجات أحفادهم يعملوها

 

ساعات بشوف ........ فيه ايه تاني اقوله

 

مش فاكر

حاولوا تفتكروا انتوا ايه الحاجات اللي بتشوفها وانتا واقف في البلكونة بالليل لوحدك

او حتى معاك حد من اخواتك

 

 

عرفتوا بقى ان البلكونة ممكن تكون من صحابي

 

 

حاجات كتير اوي بحبها هناك

 

بحب الشوارع بكل التناقضات العجيبة اللي فيها

 

بحب عمارتنا الكبيرة بكل جيرانها الملخبطين (( بتفكرني كده بعمارة يعقوبيان )) كل واحد فيها مختلف عن التاني

 

أساساً مصر كلها غريبة جدا

 

فيها كل تناقضات الدنيا

 

مسجد ... كنيسة ... شعبولا .... عبد الحليم

تامر حسني ... عمرو دياب ... فول وكشري وطعمية .... كنتالوب ولازانيا وبيتزا

 

غريبة

بس حلوة

 

كل حاجة هناك هيا اصحابي

كل حاجة

 

وكل الناس

كل الناس بكل ما فيهم من حقد وغل وكره ولؤم وخبث أصحابي

وبرضو فيه حب وعطف ورومانسية وحنان

صحيح قليييييل بس فيه

 

زي ما فيه عطيات وعنايات وحكمت

وفيه شاهيناز وميرنا وصافي

 

أكيد فيه حب وعطف ورومانسية وحنان 

 

 

الصداقة معناها كبير اوي

طبعا ما أقدرش أقول ان كل الناس اصدقائي

بس كلهم اصحابي

 

فيه مواقف بيني وبينهم

فيه ذكريات

 

أكيد لو كنت قعدت في مصر طول عمري ماكنتش هفكر التفكير ده وكنت هكرهها جدا زي ما ناس كتير عايشين فيها وكارهنها

بس احنا طبعنا كده : مش بنعرف قيمة الحاجة غير لما بنبعد عنها

 

على قولت عمرو دياب

 

فيه حاجات ياما وهيا معانا مش بنفكر أبداً فيها

غير لو ضاعت نبتدي نندم

ونعيش نحلم ترجع لينا

 

لو لفيت الدنيا بحالها أنا مش ممكن هلاقيك تاني

الأيام ديه اتغير حالها

مابقاش حد يعيش للتاني

 

فيه حاجات ياما وهيا معانا مش بنفكر أبداً فيها

غير لو ضاعت نبتدي نندم

ونعيش نحلم ترجع لينا

 

 

لو أي حد عايز الأغنية ديه يقوللي بس وأنا هبعتهاله على طول

 

 

المهم

انا خرجت اوي عن الموضوع

 

ديه الخاطرة الأدبية ومستني النقد رجاءً

 

 

 

 

 

 

 

 

 

 

 

 

بين دقائق للسعادة من أندر ما يكون في أزماننا

في لحظات ابتهاج الروح وافتتان الفؤاد برؤيتنا لهم

حين يمضي بنا كبرياؤنا وتتصاعد قوتنا

حين تدفعنا أسباب فخرنا لتقلد القوة

        نستمد قوانا من أناس ملكوا مفاتيح قلوبنا

وبعد الفراق .....

 تتبدل معالمنا وتتغير مشاعرنا

حين نجد الكل يهزمنا لتسيل دماؤنا أسفل راية إحساسنا المنهزم منكسة قرب لواء الاستسلام خفاق

وأول ما يهزمنا بعد الفراق :

 

 

(( لحظة حنين عابرة ))

 

 

فإليهم نمارس حنيناً مرغمين

نحن إلى أحاديث جميلة تقاسمتها ذات يوم قلوب مع قلوب والحب جامعهم

 

نحن إلى ضحكات رائعة رسمتها مواقف وكلمات لا تنسى

مواقف وكلمات لن ننساها مهما مضى بنا الزمن

مهما مشى بنا العمر على مهل بين دروب الحنين إليهم

دروب في بلاد الحزن على فرقتهم

ضحكات رائعة رسمتها على ثغور لطالما أنهكت سمراً حين تهب نسائم الليل تداعب وريقات الشجر

نحن إلى ساعات قضيناها كلحظات بين لهو وترف تارة وتارة بين الغضب والعتب

نحن إلى أناس نخاف من جراح قلوبنا عليهم

لانهم سكنوا قلوبنا وترعرع داخلنا حب غائب عنهم

 

ونحن إلى أناس لم يكن لهم في عقولنا مثقال ذرة من فكر

ولكن تفاجؤنا ضربات الحنين بساعات من التأمل في ملامحهم

نحن إلى إنسانٍ ...

إلى وجهٍ ...

إلى نبضٍ ...

فتكتسب أعيننا بعداً أسطورياً عميقاً وتصبح كمحيط لا قاع له ولا قرار

تبرق في أدغاله لمحات تنذر بعظمته

إنها لمحات من :-

 

 

(( الذكرى ))

 

تبدو من بعد وكأنها غيث

ولكنها كسراب يثيرك لتتبعه

وحين تصل إلى تفصيل منبعه تحتسي الحزن وصفعات الواقع تهشمك

وإن كانت ذكرى من النوع السعيد ...

فالذكرى بعد الفرقة لا تبقى بمفردها

ولا تأتيك بدون رفيق غربتها

فما يلبث أن ينجدها حنين وحدتنا

لتسبح من جديد في بحر من الشوق إليهم وأمواج الواقع تلطمك

ولا تكتمل ثلاثيتهم إلا بوجود :

 

(( البقايا ))

 

والبقايا هي بقايا الحكاية وقشور الرواية

تلاحقنا كشمس تتبع قمراً

كشوق يلحق غربة

كشظايا مجرحة بعد دوي صوت الزجاج قد سحقا

كشظايا في أعين حاضرنا تثير آلامنا وتنفتح على أثرها جراحنا

فهي بقايا حين نراها نتذكر ....

  فنحزن ونتألم على أشياء جميلة كانت موجودة ولم تعد

 

فيسعفنا في محنتنا من نحتاج له

وأول ما نحتاج له بعد الفراق هو :

 

(( الدموع ))

 

دموع تنساب من بين الهدب على شفاه لطالما تكلمت ولطالما ضحكت

ضحكت ولكن قبل الفراق

 

دموع ها نغسل ما تراكم في أعماقنا من ألم الوداع

و نطهر جرحاً حفر بسيف الفراق

وبها نخفف من وطأة الذكرى

وبعد جفاف دمعتنا

نبدأ من جديد ....

بين الفينة ....

والأخرى.

 

 

 

 

 

 

بصراحة : أنا فيه حاجات خدت (( فكرتها )) من مدونة مش فاكر اسمها ناو

بس الصياغة والتعبير وكله انا اللي كاتبه طبعا

 

يللا مستني التعليقات

 

والسلام عليكم ورحمة الله وبركاته

 

بسم الله الرحمن الرحيم

 

أول سطور أضعها في مدونتي البدائية الجديدة

 

 

البداية دائماً صعبة

دائماً مملة

ولكن (( البداية )) تكون صعبة فقط في البداية

 

وبعد ذلك

تصبح ذكريات جميلة

 

 

على أي حال

 

 

أسلوبي في الكتابة أفضل بكثير مما تروه الآن

 

ولكني متوتر ومرتبك ولا أعلم ماذا أكتب

 

 

الأيام بيننا وسترون موهبتي إن شاء الله

 

 

 

 

فكك بقى من حوار الفصحى ده عشان الحكاية مش طالبة نكد ناو

 

فكرة المدونة والاسم العجيب بتاعها

 

انا اساسا واحد دايما بسأل

ليه ليه ليه

 

بسأل نفسي

 

دايما أعمل حاجات كتير ومش بنجح فيها زي ما أنا عايز

 

واسأل نفسي انا منجحتش ليه

 

 

فلان احسن مني ليه

 

 

وكملت بقى لما لقيته بيقوللي هات اسم للمدونة

 

قعدت افكر افكر افكر

 

روحت المطبخ اعمللي كوباية شاي أخضر وقعدت أفكر أفكر

 

 

وافتكرت موقف حصل معايا قبل كده

 

كنت عايز اعمل منتدى

عشان اكسب طبعا لان انا واحد مهتم اوي بالمكسب والخسارة

 

اكسب فلوس يا جماعة محدش يقوللي تكسب حب الناس واحترامهم والكلام بتاع طه حسين ده

 

 

المهم جيت اعمل المنتدى ووقفت في حكاية الاسم ديه

 

فكرت في حاجات كتير بس كلها مانفعتش

في الاخر طنشت عالموضوع

 

وما عملتش منتدى

 

ودلوقتي برضو مقروف في حوار الاسم ده (( اسم البلوج

 

ليييييييييه ؟؟؟

ليه لازم يكون فيه اسم ؟؟؟

يا اخي انا حر مش عايز أعمل اسم

 

عايزه كده سبيل

انتا مال أهلك انتا

 

 

ومن هنا جت الفكرة وسميته : whys